ചെറായി വരകള്‍ - ഭാഗം പലതില്‍ ഒന്ന്

ഇതോടെ ചെറായി ചെറായി എന്നൊരു വര്‍ത്താനം ഇവിടെ നില്‍ക്കണം എന്ന ഉദ്ദേശത്തോടെയാണീ മുന്തിയതരം പോസ്റ്റ്. ദാറ്റീസ്, ദിസീസ് ദ ലാസ്റ്റ് പോസ്റ്റ് (ആദ്യായിട്ട് ഒരു ലാസ്റ്റ് വാണിങ്ങ് കൊടുക്ക്വ എന്ന സില്‍മാ ഡയലോഗ് ഓര്‍ക്ക്വ) എന്നര്‍ഥം !

തങ്ങള്‍ എഴുതുന്നില്ല, ഓര്‍മ്മകള്‍ അയവിറക്കി ബാക്കി കാലം കഴിഞ്ഞോളാം എന്ന് ലതികേം സുഭാഷും എഴുതിത്തന്ന സ്ഥിതിക്ക്, ഇനീം വൈകിച്ചാല്‍ യുവ ബ്ലോഗര്‍മാര്‍ കേരളഹഹഹ-യുടെ കഥ കഴിച്ചേക്കും എന്ന് മരമാക്രിയുടെ ഇന്റലിജന്‍സ് റിപ്പോര്‍ട് ഞാന്‍ കണ്ണടച്ചു വിശ്വസിക്കുന്നു. ഇതിനിടെ, കേരളഫാര്‍മര്‍ നടുക്കടലില്‍ വെച്ചു പരിചയപ്പെട്ട (പ്ലീസ്, ചിത്രം ശ്രദ്ധിക്കൂ) അലെക്സ് ഫെലിക്സ് പുലിക്സ് (ഓ, ച്ഛെ ! കണ്ട്രോള്‍ വിട്ടു..) ഡിക്രൂസ് ആന്റണി പെരേര ഗോണ്‍സാല്‍വസ് എന്ന ചാവേര്‍ മുക്കുവനും പുതിയ ബ്ലോഗില്‍ ചെറായിസ്മരണകള്‍ ഖണ്ഡശ: കീച്ചിയേക്കുമെന്ന ഭീഷണി തുടരുന്നു.

ഇമ്മടെ സംഗമ സ്ഥാനാന്ന് കരുതി ചെറായി റിസോര്‍ട്സില്‍ ചെന്നു കയറിയതോടെയാണ് നാടകീയ രംഗങ്ങളുടെ തുടക്കം. ഗേറ്റില്‍ വെച്ച് മന്ദം മന്ദം ആനനട കണ്ടപ്പഴേ, ലോബിയില്‍ ഇരുന്ന രണ്ടോളം വരുന്ന സായ്പ്പുമാരും മറ്റാരുടേയോ മൂന്നു മദാമ്മമാരും ഉപചാരപൂര്‍വം എണീറ്റു ‘കൊടു കൂപ്പുകൈ‘ ഭാവത്തില്‍ സ്തബ്ധത ഭാവിച്ച് നിന്നു. അവസരത്തിനൊത്തുയര്‍ന്ന് , ക്രിഷ്ണന്‍ കുട്ടി എന്നും ഏറിയാല്‍ നാണപ്പന്‍ എന്നും ഏതു നിമിഷവും എനിക്ക് വിളിക്കാന്‍ തോന്നിയ മാനേജര്‍ കൂട്ടത്തില്‍ സീനിയറോട് കുശുകുശുത്തു : “ ഫേയ്മസ് മേന്‍ ഇന്‍ കേരള. കളരി ഗുരു & കഥകളി ആക്ടര്‍. വേരി സീരിയസ് മേന്‍. ഡോണ്ട് മി...അല്ല, സ്പീക് ടു ഹിം”.

തിരികെ ഗേയ്റ്റ് കടക്കാന്‍ നേരത്ത്, ബ്ലൌസ് ഇടാതിരുന്നെങ്കില്‍ നിക്കക്കള്ളിയില്ലാണ്ടായേനെ എന്നു തോന്നിച്ച മദാമ്മയെ ഒന്നു തിരിഞ്ഞു നോക്കി. ഒരു തകര്‍പ്പന്‍ ചുംബനത്തിലേര്‍പ്പെട്ടിരുന്ന വനിതയുടെ മുഖം കാണാന്‍ പറ്റിയില്ല. ക്രിഷ്ണന്‍ കുട്ടി നിശ്ചലനായി നിന്ന്. ആ ദൃശ്യം തന്റെ മനക്കണ്ണില്‍ പകര്‍ത്തിക്കഴിഞ്ഞു ! ഈ സീസണിലെ ക്ഷാമകാലം അതിജീവിക്കാന്‍ കൃഷ്ണന് അതു മതി.
മുടിഞ്ഞ ചുംബകന് മൂന്നു മൂര്‍ദ്ദാബാദ് പറഞ്ഞ് ഞാന്‍ പടിയിറങ്ങി.

*******സംഗമസ്ഥാനത്ത് എത്തിയപ്പോള്‍ ഞാനാദ്യം കാണുന്നത്, ഗോപികാഭാവത്തോടെ എന്നെത്തന്നെ സാകൂതം അഥവാ നിര്‍ന്നിമേഷകളായി നോക്കി കഥ കഴിഞ്ഞിരിക്കുന്ന ബിന്ദു-പീരിക്കുട്ടി ബ്ലോഗിണികളെയാണ്. ഞാനത് ശ്രദ്ധിക്കാന്‍ പോയില്ല. എവിടേയും ഇത് പതിവുള്ളതാണല്ലൊ...

മുറ്റം അഥവാ തീരം നിറയെ കട്ടമരങ്ങളും അവയ്ക്കിടയില്‍ സൂത്രശാലികളായ ബ്ലോഗര്‍മാരുമായിരുന്നു. പലരേയും ഞാനാദ്യമായി കാണുകയായിരുന്നു. അപ്പോളതാ, തീരത്തുനിന്നൊരു കൂട്ടക്കരച്ചില് ! വൃദ്ധശബ്ദങ്ങളാണ് കൂടുതലും കേള്‍ക്കുന്നത്. അവയില്‍ത്തന്നെ അങ്കിളിന്റേം വെള്ളായണീയുടേം വേറിട്ടു കേള്‍ക്കാം. എതിരെ രണ്ടു മുക്കുവര്‍ കടന്നു പോയി. ‘മൂന്നാംപക്കം’ എന്ന് അവര്‍ അടക്കിപ്പിടിച്ചു പറയുന്നതു വ്യക്തമായി കേട്ടു. മൈ, ഗോഡ് !!! എങ്കില്‍ കൊടും ട്രാജെഡി നടന്നിരില്ല്ക്കുന്നു ! വര്‍ഷങ്ങളായി നര്‍മ്മമാണല്ലൊ എന്റെയൊരു തട്ടകം. അതുകൊണ്ട്, സിമ്പിള്‍ ദു:ഖം പോലും കൊടും അലര്‍ജിയാണ്. ആദ്യം ഞെട്ടല്‍ പിന്നെ ഞെട്ടിത്തരിക്കല്‍‍, സംഭാരം കുടിച്ചുകൊണ്ടിരിക്കണമെന്ന തോന്നല്‍ എന്നിവയാണ് സൈഡ് ഇഫക്റ്റുകള്‍. ങ്ഹാ, അപ്പോള്‍ ദ തീരം.... ബ്ലോഗര്‍മാര്‍ പാഞ്ഞടുക്കുകയാണ്.. എല്ലാരും നടുക്കടലിലേയ്ക്ക് നോക്കി ഒരാളോട് “ നോ, മോര്‍ ... നോ, മോര്‍ ” എന്നു യാചിക്കുന്നതു കാണുന്നു.
ആരാണയാള്‍ ? എന്താ കഥ ? അല്ലാ, ഏതാ ഈ കടല് ?

ഞാന്‍ നോക്കുമ്പേണ്ട്രാ.... ഇത് നമ്മടെ... !!! (ചിത്രം നോക്കൂന്ന് )

അലെക്സ് ഫെലിക്സ് പുലിക്സ് (ഓ, ച്ഛെ ! കണ്ട്രോള്‍ വിട്ടു..) ഡിക്രൂസ് ആന്റണി പെരേര ഗോണ്‍സാല്‍വസും ഫാര്‍മറും നടുക്കടലില്‍ ഏറ്റുമുട്ടിയപ്പോള്‍...ക്യാച്ച് കടലില്‍ കുടഞ്ഞു കളഞ്ഞ് കരഞ്ഞു കയറിവരുന്ന ഗോണ്‍സാല്വസിനെ ഞാന്‍ മറക്കില്ല. ഇപ്പോള്‍ ഗോണ്‍സു കടലില്‍പ്പോക്കില്ല, ഫൂള്‍ ടൈം ബ്ലോഗെഴുത്താണ്.

ഇതെതുമ്പോള്‍, പത്തുമുപ്പതു കൊല്ലം മുമ്പ്, എന്റെ വല്യമ്മ കന്യാകുമാരിയില്‍ പോയ കഥ വര്‍ണ്ണിച്ചത് ഓര്‍ത്തുപോയി. ജന്മജന്മാന്തരങ്ങളായി നീന്തലറിയാത്ത ഫാമിലിയില്‍ ജനിച്ച വല്ല്യമ്മ കടലിലിറങ്ങി. “ ചുറ്റും നോക്ക്യപ്പൊ ന്റെ സജ്ജീ, എന്റെ പാദത്തിനു ചുറ്റും ചുറ്റും സമുദ്രങ്ങനെ അലയടിക്ക്യാ...” യിരുന്നു പോലും !
പാവം 86-കാരി വല്യമ്മയ്ക്ക് ഇപ്പൊ ഒട്ടും വയ്യ. പടം നോക്കൂ. അല്ലാണ്ടെന്താപ്പൊ....
***

ഫോം പൂരിപ്പിക്കാന്‍ ഞാനിരുന്ന ബെഞ്ചിന്റെ ഒരു കാലിന്റെ ക്ലോസപ്പ് ചില ദ്രോഹികള്‍ പാട്ടാക്കിയത് എന്റെ ഫാന്‍സിന് ഒട്ടും സഹിച്ചിട്ടില്ല എന്നറിയാമല്ലൊ. സത്യത്തില്‍ ഇതാണ് സംഭവിച്ചത്. ‘നാരിയല്‍ കാ പാനി’ വിതരണം ചെയ്ത് പോങ്ങുമ്മൂടന്‍ സംഭവം ഒതുക്കിത്തീര്‍ക്കുകയായിരുന്നു. ങും, പോട്ടെ... ചല്‍നേ ദൊ !

ഹാള്‍ നിറഞ്ഞു കവിഞ്ഞ് സര്‍പ്ലസ് ബ്ലോഗര്‍മാര്‍ പുറത്തേയ്ക്ക് തെറിച്ചു വീഴുന്നതു കാണേണ്ട കാഴ്ചയായിരുന്നു. പരിചയപ്പെടുത്തിയ ജി. മനു മോഹന്‍ലാലിന്റെ ഫാമില്യാന്ന് യാരിദ് പറഞ്ഞപ്പോള്‍ വിശ്വാസം വന്നില്ല. പക്ഷെ, നേരിട്ടു കണ്ടപ്പോള് യാരിദിനെ നേരിട്ടഭിനന്ദിക്കണമെന്നു തോന്നി. പ്രസംഗത്തില്‍ കൂടുതല്‍ അലങ്കാരപ്രയോഗങ്ങള്‍ നടത്തുമ്പോളാണ് ഈ ചെരിവ് സാധാരണയായി സംഭവിക്കാറുള്ളതെന്ന് മനു എന്നോട് പൊട്ടിക്കരഞ്ഞുകൊണ്ട് പറഞ്ഞു .
(ചിത്രത്തില്‍, വഴിക്കു വഴി മൂന്നു അനോനികളുടെ ഫോണ്‍ കേട്ട് പരവശനായി നില്‍ക്കുന്ന കഥാനായകനെ കാണാം )

മലയാളത്തിലെ ഏക മാന്ത്രികബ്ലോഗറാണ് ബിലാത്തിപ്പട്ടണം . കണ്‍കെട്ടില്‍ തുടങ്ങി മഹേന്ദ്രജാലത്തിലെത്തി നില്‍ക്കുകയാണ് താന്‍ എന്ന് ബിലാത്തി നാടകീയമായി പറഞ്ഞു.

ഒരെണ്ണം കാണിച്ചു തരാമോ ? ഞാന്‍ കെഞ്ചി.

മുയലുണ്ടോ എന്ന് ബിലാത്തി.

ഉണ്ടെങ്കില്‍ ? എന്ന് ഞാന്‍.

മജീഷ്യന്മാര്‍ക്ക് മുയല്‍ അത്യന്താപേക്ഷിതമാണെന്ന് അറിയാമല്ലൊ എന്ന് 500 വാക്കില്‍ കുറയാത്ത ഉപന്യാസം കണക്കെ ബിലാത്തി.

കടല്‍ക്കര്‍ഷകനു ശേഷം ഫാര്‍മറുടെ പ്രത്യേക ശ്രദ്ധയ്ക്കു പാത്രമായ കക്ഷിയാണ് “ ഞാന്‍ സുല്‍ ‍... സുല്‍ഫീക്കര്‍ ‍‍’ എന്ന് സ്വയം പരിചപ്പെടുത്തിയ ഗള്‍ഫിയന്‍ ‍. ആയിരക്കണക്കിനു ബ്ലോഗുകളിലായി പതിനായിരക്കണക്കിന് തേങ്ങയുടച്ച സുല്ലിനായിരുന്നു ഏറ്റവും വല്യ ഫാന്‍ ഫോളോയിങ്ങ്. യുവ ബ്ലോഗര്‍മാരുടെ അഭ്യര്‍ഥന മാനിച്ച് “കോക്കനട്ട്- സം ബ്രേക്കിങ്ങ് ടെക്നിക്ക്സ് ” എന്ന അര മണിക്കൂര്‍ ക്ലാസ്സ് ഫാര്‍മര്‍ ശബ്ദായമാനമായി ബഹിഷ്ക്കരിച്ചു. ശ്രീ എന്നൊരാള്‍ വന്നതില്‍പ്പിന്നെ തന്റെ കഥ കഴിഞ്ഞുവെന്ന് സുല്‍ പറയുമ്പോള്‍ സുല്ലിന്റെ ഒരൊറ്റ തേങ്ങയടിമാത്രം കമെന്റായി കിട്ടിയിട്ടുള്ള ബ്ലോഗ് പോസ്റ്റുകളെക്കുറിച്ച് പഴയ ബ്ലോഗര്‍മാര്‍ സ്വകാര്യമായി ഓര്‍ത്ത് വിതുമ്പുന്നതു കാണാമായിരുന്നു.

തന്ത്രി ചാണക്യന്‍ Vs. ഗോഡ് ലെസ്സ് ചാര്‍വാകന്‍ ലഞ്ച് ടൈമിലെ ഒരു കലക്കന്‍ കാഴ്ച്ചയായിരുന്നു.

അരീക്കോടനും മറ്റു 2 കൂടുതല്‍ ബാള്‍ഡ് മെന്നായ സമാന്തരനും ബാബുരാജും കണ്ണോടുകണ്ണ് ഇടഞ്ഞയുടനെ ഒരു പരസ്പര സഹായസഹകരണസംഘം രൂപീകരിക്കുകയായിരുന്നു. അങ്കിളും അനില്‍ ‍@ബ്ലോഗും സംഘത്തിലെ മൂന്നുരൂവാ പ്രൈമറി മെംബറാവാന്‍ പിടിപ്പതു നോക്കി. നടന്നില്ല.
മൂന്നു പേരും ചില നഗ്നസത്യങ്ങള്‍ വിളിച്ചു പറയുന്നതു കേള്‍ക്കൂ..

അമേരിക്കന്‍ പൌരന്‍ സിബുവിനെ കണ്ടപ്പോള്‍ ഞെട്ടിപ്പോയി ! 6 അടി 4 ഇഞ്ച് എന്ന് എന്നും ചാറ്റില്‍ വന്ന് പറഞ്ഞ് എന്നെ വിശ്വസിപ്പിച്ചിരുന്ന പഹയന്റെ യഥാര്‍ഥ പൊക്കം എത്ര്യാന്നാ ? പടം കണ്ടു നോക്കൂ... തോന്ന്യാസി അവസരത്തിനൊത്തുയരുന്നതും കാണാം.

പരമ്പരാഗതമായി പാവപ്പെട്ടവനും പുത്തന്‍ പാവത്താനും.
എല്ലാ പരൂഷയും പഷ് ക്ലാസ്സില്‍ പാസ്സായ ശീലമുള്ള സ്കൂളദ്ധ്യാപകനായ പാവത്താന്റെ മുന്നില്‍ ഭൂവുടമയും ഹുണ്ഡികക്കാരനും ആയ പാവപ്പെട്ടവന്‍ പതറാതെ പിടിച്ചുനിന്നത് ദൈവാനുഗ്രഹമത്രേ... !

ജ്നാനപ്പാന, വിദുരവാക്യം, ആത്മോപദേശശതകം എന്നിവ യഥാക്രമം ഗുരുസ്വാമി ആഞ്ഞം അരുണ്‍ കായംകുളം ചെയ്യുന്നതിനിടയ്ക്ക് നീചസ്ഥന്‍ പോങ്ങുമ്മൂടന്‍ ചോദിക്കുന്നു : ഗുരുനാഥാ, ഒരു സംശയ്...

ശ്രീശ്രീ അരുണിന് വിശ്വസിക്കാനായില്ല. സശയോ, ഇത്ര നേരത്ത്യോ ? അജ്ഞാനീടെ കുണ്ഡലിനി ഇത്ര നേരത്തെ ഉണര്‍ന്നൂന്നൊ ?!

ശിഷ്യന്റെ നാലാമത്തെ ചക്രത്തിന്റെ ഏകദേശ കിടപ്പ് ഗണിച്ച് ഗുരു കൈകൊണ്ട് തൊട്ടുനോക്കി.
ഇതേതാ ചക്രം ?

കക്ഷം വരെ പടര്‍ന്നു കയറിയ സിക്സ് പാക്കിന്റെ അറ്റമാണ് ഗുരോ...

അടുത്ത നിമിഷത്തില്‍ ഗുരു അരുണിനെന്തു സംഭവിച്ചു ? പോങ്ങ്സ് രക്ഷപ്പെട്ടോ ? ഒരു പിടീല്യ.
...........................
താഴെ, ഗുരുസ്വാമി അരുണ്‍ കായംകുളം പോങ്ങുമ്മൂടന്റെ വിത്ഡ്രാവല്‍ സിമ്പ്ടത്തെ
വിശകലനം ചെയ്ത് ഔട്-ഓഫ്-ദ-വേള്‍ഡ് ധൈര്യം പകരുന്ന, ഭക്തിനിര്‍ഭരമായ ചിത്രം .

മീറ്റില്‍ ഏറ്റവും കുറവു ശബ്ദമുണ്ടാക്കിയയാള്‍ തറവാടി തന്നെ.
ഔചിത്യം വിട്ടുള്ളൊരു കളീല്യ. ഡെലിഗേഷന്‍ ഓഫ് പവേഴ്സില്‍ വിശ്വസിക്കുന്ന ഈ ബ്ലോഗര്‍ ബ്ലോഗിണീ സഹധര്‍മ്മിണിയെ ഒരു ഭാരിച്ച ചുമതലയേല്‍പ്പിക്കുന്നതു കാണുക..

പ്രകൃത്യാ വിപ്ലവകാരിയും, രൂപത്തില്‍ പ്രോലിറ്റേറിയനും ആയ
മുള്ളൂര്‍ക്കാരന്‍ തന്റെ പേര് അന്വര്‍ഥമാക്കുന്നു.

മുമ്പ് പറഞ്ഞല്ലൊ. സുല്ലിനെ പൊതിഞ്ഞ ഫാന്‍സ്.

ബ്ലോഗ്മീറ്റ് കഴിഞ്ഞേന്റെ പിറ്റേന്ന്
ഞാന്‍ കണ്ട സ്വപ്നം. മാറ്റാന്‍ കാപ്പിലാന്‍ ചേകോര്‍ തന്നെ.

മീറ്റിനു ശേഷം...

ഒരറിയിപ്പ്: ഇതിന്റെ രണ്ടാം ഭാഗം മുയ്ക്കെ ക്യാരിക്കേച്ചറുകളാണ്. എനിക്കു പെട്ടെന്നു വരയ്ക്കാന്‍ പറ്റുന്ന ചെറായിക്കാര്‍. ജാതി-മത-ലിംഗ-ദേശഭേദമില്ലാതെയായിരുന്നു തെരഞ്ഞെടുപ്പ്. വര കഴിഞ്ഞു. ഇനി ഇട്ടാല്‍ മതി. വരയപ്പെടാത്തവര്‍ക്കു നല്ല സിമ്പിള്‍ മോന്തകള്‍ നല്‍കാത്തതിനു പരാതിക്കാര്‍ ‘അവന് ’ ഹര്‍ജി നല്‍കേണ്ടതാണ് :)

ശുഭം