പുലി 53 : ഇടവപ്പാതി

ഇടവപ്പാതി എന്ന സിനോജ് ചന്ദ്രന്‍ പുലിയാണൊ ?

പ്രിയപ്പെട്ടവരെ,

ഇത് സ്വന്തം പടങ്ങള്‍ക്കുവേണ്ടി എന്നെ പേടിപ്പിയ്ക്കുംവിധം ക്ഷമയോടെ കാത്തിരിയ്ക്കുന്ന ആ ബ്ലോഗ്ഗര്‍മാരോടുള്ള എന്റെ ക്ഷമാപണമാണ്. മൂന്നു മാസങ്ങള്‍ക്കു മുന്‍പ് വെറുമൊരു കുസൃതിയ്ക്ക്, 2007 ഡിസംബര്‍ 31ന് 100 പുലികളെ അണിനിരത്തും എന്ന് വിളംബരം ചെയ്തപ്പോള്‍, ആ സമയ പരിധിയ്ക്കും രണ്ടു മാസം മുന്‍പു തന്നെ, അതും വെറും 48 പടം മാത്രം വരയ്ക്കാനായി ശേഷിയ്ക്കെ, വര കാത്തുകിടക്കുന്ന 190 ഓളം പടങ്ങള്‍ എന്റെ ദിനചര്യയെപ്പോലും തകര്‍ത്തുകളയുംവിധം ഒരസ്വസ്ഥതയായി പരിണമിയ്ക്കും എന്ന് ഊഹിയ്ക്കാനാവുമായിരുന്നില്ല. എന്നിട്ടും, ഈ ദിവസത്തെ മദ്ധ്യാഹ്നത്തിന്റെ അസ്വസ്ഥമാക്കിയ ഏതോ മടുപ്പിനിടയിലും, കതകിലൊരു മുട്ടുപോലുമില്ലാതെ ഇങ്ങോട്ടുവന്ന്കേറിയ ഒരു ചാറ്റിന് അയാളെപ്പോലും അത്ഭുതപ്പെടുത്തികൊണ്ട് 5 മിനിറ്റിനകം നെതര്‍ലന്‍ഡ്സിലേയ്ക്ക് അയച്ചുകൊടുത്ത ക്യാരിക്കേച്ച്ചര്‍ ഒരു സുജനമര്യാദയുടെയും പ്രതീകമല്ലെന്ന് ഞാനേല്‍ക്കുന്നു. അതെന്റെ പിഴ.... എന്റെ പിഴ.... എന്റെ വലിയ പിഴ..! .................................

എന്നൊക്കെ വിടുവായത്തം‍ പറയുമെന്നാണോ കരുത്യെ ? നല്ല കഥ ! നിങ്ങളെവിടുത്തുകാരനാ മാഷെ ? എന്തറിഞ്ഞിട്ടാ, എനിയ്ക്കെതിരെ സംഘടിയ്ക്കാനുള്ള ഈ പൊറപ്പാട് ? ങ്ഹെ ?
കാര്യം, പയ്യന് ഇടയ്ക്കിടയ്ക്ക് കടുമാങ്ങതീറ്റയുണ്ട്. പിന്നെ, ഇമ്മടെ വിശാലാക്ഷി ഫാക്ടര്‍ (ഇമ്മടെ കൊടകരയ്ക്കടുത്ത് ചെമ്പൂച്ചിറയാണാശാന്റെ ഇല്ലം).

പക്ഷെ, ഇതിന്യൊക്കെ കടത്തിവെട്ടുന്ന മറ്റൊരു രഹസ്യണ്ട്.. അറിയാമൊ ? അറിയാമോന്ന് ?

ഞാനൊരൊറ്റ കാര്യേ ചോയ്ക്കണുള്ളൂ -നിങ്ങള് ഇന്നത്തെ പുലീടെ 1 , 2 , 3 , 4 എന്നീ അവയവങ്ങള്‍ കണ്ടിട്ടുണ്ടോ ? ഉണ്ടെങ്കില്‍ നിങ്ങളീക്കണ്ട ബഹളോന്നൂണ്ടാക്കില്ല. കമാന്ന് മിണ്ടില്യ. സംശ്യണ്ടെങ്കീ പോയി നോക്കീട്ടു വാ..
----------------------------------------------
ഇപ്പോന്തായി ? എവനാ, യെവനെ ഒന്നു വരച്ചുപോവാത്തെ ?