പതിവിന്പടി അന്നും എന്റെ ക്വാര്ട്ടേര്സില് കലക്കനൊരു സുപ്രഭാതം.
2 മണിക്കൂറിന്റെ ചിന്തയ്ക്കു ശേഷം ഞാന് സ്ഥിരം മൂന്നു പ്രഭാത കൃത്യങ്ങളിലേയ്ക്കു കടക്കാന് മാനസികമായി തയ്യാറെടുത്തുകഴിഞ്ഞു.
കൃത്യം നമ്പര് 1. ഉച്ചയ്ക്ക് ഊണു കഴിയ്ക്കാണ്ടിരുന്നാല് തടി കുറയുമോ എന്ന് ആരോടെങ്കിലും ചോദിയ്ക്കാന് തീരുമാനിച്ചു.
നമ്പര് 2 വെറുതെ ചടങ്ങിന് കാവിലമ്മേ ശ്ശക്തിതരൂ എന്നും പറഞ്ഞു കഴിഞ്ഞു.
കിറുകൃത്യം നമ്പര് 3 കടുംകാപ്പിയ്ക്കു മുന്പ് പതിവുള്ള കോട്ടുവാ.
അതെടുക്കാന് വേണ്ടി ഞാന് വാതില് തുറന്നു പുറത്തിറങ്ങിയതേ ഉള്ളൂ.
അതാ, നിക്കുന്നു ഒരു മൂലയില്..... ഓഫ് ഓള് മെര്ച്ചന്റ്സ് ഇമ്മടെ ഇക്കാസ് മെര്ച്ചന്റ് !
ദശാബ്ദങ്ങളായി, ട്രേഡേഴ്സ്, മെര്ച്ചന്റ്സ്, പൊതുവില് ചേംബര് ഓഫ് കോമ്മേഴ്സുകാര് ഇന്കം ടാക്സ് ക്വാര്ട്ടേര്സിന്റെ പരിസരത്ത് വരാറില്ല. എന്നിട്ടും ..... !?!
ഒന്നൂല്യാ ചേട്ട, ഒരു റിട്ടേണിന്റെ കാര്യം....
ഞാന് കോരിത്തരിച്ചു ! ഡിപ്പാര്ട്മെന്റിലെ എന്റെ 20 കൊല്ലത്തിനുള്ളില് ആദ്യമായാണ് ഒക്ടോബര്31ന് ഫയല് ചെയ്യേണ്ട ഒരു റിട്ടേണ് ആഗസ്റ്റ് 31 നു തന്നെ ഫയല് ചെയ്യാന് ഒരു അസ്സെസ്സീ ഞാന് തയ്യാര്, നിങ്ങളോ ? എന്നും ചോദിച്ച് കടന്നുവന്നിരിയ്ക്കുന്നത്.
ഞാന് ഉടന് യന്ത്രം കറക്കി ഞങ്ങടെ കമ്മീഷണറെ വിളിച്ചു. ഇല്ല, എനിയ്ക്കിനി മടിച്ചുനില്ക്കാനാവില്ല എന്നു പറഞ്ഞുകൊണ്ട് കമ്മീഷണര് ദല്ഹിയിലെ സി.ബി.ഡി.ടി. യെ വിളിയ്ക്കാന് അകത്തേയ്ക്കോടി.
വരൂ, ഇക്കാസ്, നിങ്ങള് വെറുമൊരു മെര്ച്ചന്റല്ല . അതുകൊണ്ട്, ഇഡ്ഡലിയും ചട്ണിയും കഴിച്ചിട്ടു പോയാല് മതി.
അല്ല, ചേട്ടാ, എനിയ്ക്കൊരു റിട്ടേണ്... ചേട്ടനാവുമ്പൊ കൊഴപ്പോല്യ, വയസ്സു 44ഉം ആയി, മഹാതടിയനാണെങ്കീപ്പൊ എന്താ, നല്ലൊരു മനസ്സ്ണ്ടല്ലൊ.. എനിയ്ക്കിത്രേ അറിയാനുള്ളൂ.. റിട്ടേണ് ചെയ്യ...
ഹെന്തായിത് ! നിങ്ങള് തനിത്തങ്കമാണു, വെറും മെര്ച്ചന്റല്ല.. അതറിയാമൊ ? സെക്ഷന് 139(1) പ്രകാരം റിട്ടേണ് ഒക്ടോബര്31ന് ഫയല് ചെയ്താ മതി എന്നിട്ടും ഈ ആഗസ്റ്റ് 31 ന്, അതും അത്ഭുതമെന്നു പറയട്ടെ, ബഹുസന്തോഷത്തോടെ ! ഓക്കെ, പി. & എല്. എക്കൌന്ടും ബാലന്സ് ഷീറ്റും ഓഡിറ്റ് റിപ്പോര്ട്ടും ഉണ്ടല്ലോലേ ?
ഇക്കാസ് ഒറ്റയലര്ച്ചയാണ് ! ഷട്ടപ്പ് !
ബാഗ്ലൂര് നിന്ന് ജാസൂട്ടി എന്നൊരു കുട്ടി എന്റെ പോസ്റ്റില് ഇട്ട കമന്റിനു റിട്ടേണ് കമന്റിടണോ എന്നു ചോദിയ്ക്കാന് വന്നതാണ്.
ഞാന് മരിച്ചപോല്യായി. ഇവനെ ഇന്നു ഞാന്...
ഒരുവിധം പറഞ്ഞൊപ്പിച്ചു : സോറി, ഇഡ്ഡലി സ്റ്റോക്കില്ല. മാവു തീര്ന്നു.
(‘പുല്യാണം’ സിയയുടെ പ്രയോഗമാണ്)
